News

Tlabunga YMA Branch hrang hrang hruaitute chuan tunhnaia All India Chakma Students’ Union (AICSU) in Tlabung leh a chhehvel luah hmasatu anga Chakma-te an inchhalna thuchhuah an siam copy chu nimin (7.9.2026) khan an hâl. Mipui thahnem tak an pungkhawm.

AICSU-in tun hnaia Chakma-ten Chittagong Hill Tracts-a awm hmun an khuar tan dan an tarlannaah, Khawthlangtuipui kam ram pharh tha lai chu Tuichawng lui thlengin tun hmaa Chakma-te lo chen tawh thinna angin an chhal niin, vawiina he thuchhuah halna hun kaihruaitu Tlabung Branch YMA President TC Lalnunmawia chuan sawiin, “History suasamna a ni,” a ti.

Zodin Branch YMA Finance Secretary Vanlalhmuaka leh Chawnpui Branch YMA President Vanlalnghaka Palian-te chuan Tlabung leh a chhehvel chu eng tik lai mahin Chakma-te ram a nih ngai loh thu leh, neitu nihna chuhpuitute do let kawngah a tawp thlengin Tlabunga Mizo mipuite, Mizoram leh Mizo hnam tan zai khatah luanga an tanho zel tur thu an sawi.

Tlabung khaw chhunga Mizo pungkhawmte hian thuziak chi hrang hrang kengin, Tlabunga Mizote chu Mizoram leh Mizo hnam tan an din zel dawn thu te, Mizoram ramri venga a tawp an thlen tur thute leh Mizo history chu Chakma-te ziah danglam theih a nih loh thu inziakate an keng.

Mizoram state hla ‘Aw nang, kan Lal kan Pathian’ tih chu an sak rual hnuah resolution chi hrang hrang – Tlabung khua hi khawvel awm tirh ata, pi leh pu te aṭangin Mizo te ta a ni a, engtik lai mahin Chakma khua a ni ngai lo tih te, AICSU-te hian Mizoram chhunga Mizo te ramri leh thuneihna zah lo takin an rawn pal zut a, Mizoram mipui min cho a ni tihte leh, Tlabung hi Mizoram chhunga khaw pakhat, Mizo tawng, Mizo nunphung leh Mizo sakhuaa enkawl leh vên him a ni, tih te chu lungrual takin an pawm.

Chumi hnuah AICSU thuchhuah siam chu YMA Branch tina president leh secretary theuhten an hâl a ni.