A thlawnin ram pe phal

Ni 20.3.2026 (Zirtawpni) khan Aizawl DC Lalhriatpuia kaihhruaina hnuaiah Sairang Railway Station panna kawng laih zau tur chungchang rel a ni. He thutkhawmah hian PWD lam atangin PWD Sr. EE David Lalrinliana, ram neitu C Laltanpuia (Mosia Agency) leh DC office-a thawktute an tel.

Meeting-ah hian ram neitu C Laltanpuia chuan a ram chu sawrkarin a mamawh a nih phawt chuan a ui loh mai bakah kawng kal tana tha zawk tur a nih phawt chuan tuna ruahmanna awm sa mai bakah a aia tam pawh a tul anga pek/laihchhiat a ui loh thu a sawi a, “Chutih rualin, a ram hungna pal, gate, chowkidar chenna in leh chokate tihchhiat a ngaih dawn avangin a sak thatna tur tlem azawng min tum sak theih an nih chuan ka ram tihchhiat man emaw, zangnadawmna engmah ka phut lo,” a ti.

Tin, sawihona kal zelah C Laltanpuia hian sum leh pai engmah beisei neih hauh lovin vawi tam tak a ramchhungah khawtlang leh sawrkar tan kawng a thlawnin a lo laiihtir/pek tawh thin thu te hriat a ni. Tuna national highway atanga Sairang Cricket Ground panna tur kawng leh tuna Sairang Railway Station panna kawngte pawh hi a thlawna a pek vek nih thu sawilan a ni.

Hetianga sawrkar, ram leh mipui tana a inpekna leh thilphalnaah Aizawl DC chuan lawmthu a sawi mai bakah a inpekna te chu ropui a tih thu a sawi a ni.